Gürcüstanda səfərdə olan ATƏT sədri müxalifət liderlərinin saxlanmasını pisləyib

ATƏT-in fəaliyyətdə olan sədri, Finlandiyanın xarici işlər naziri Elina Valtonen Ermənistandan sonra Gürcüstana səfər edib. 24News.ge xəbər verir ki, ATƏT-in sədri Gürcüstanın xarici işlər naziri Maka Boçorişvili ilə görüş keçirib və görüşdən sonra mətbuat qarşısında birgə brifinq təşkil olunub. ATƏT sədri Gürcüstanda baş verən siyasi və hüquqi proseslərlə bağlı narahatlığını ifadə edib. Elina Valtonen bəyan edib ki, müxalifət liderlərinin qeyri-proporsional hüquqi prosedurlar nəticəsində saxlanılması ATƏT tərəfindən pislənir. O, Gürcüstanda ifadə və toplaşma azadlığının sual altına düşdüyünü qeyd edib: “Vətəndaş cəmiyyəti sabitlik üçün təhlükə deyil. Qeyri-hökumət təşkilatları, insan hüquqları müdafiəçiləri və jurnalistlər demokratik dözümlülüyün vacib hissəsidir. Onlar innovasiyalara təkan verirlər və səsləri eşidilməli, qorunmalıdır”, – deyə Valtonen vurğulayıb. O, həmçinin Gürcüstanda qəbul edilən vətəndaş cəmiyyəti, media nümayəndələri və jurnalistlərə təsir edən məhdudlaşdırıcı qanunvericiliyə diqqət çəkib. Onun sözlərinə görə, bu qanunlar demokratik idarəetməyə mənfi təsir göstərir. ATƏT sədri bildirib ki, Gürcüstan hökuməti insan hüquqları, ifadə azadlığı və ümumi azadlıq prinsiplərinin qorunması istiqamətində addımlar atmalıdır: “Gürcü xalqı öz gələcəyinə özü qərar verməlidir. Hər bir demokratik sistemdə xalqın seçmək hüququ təmin olunmalıdır”, – deyə o qeyd edib. Elina Valtonen səfəri zamanı Gürcüstanın Cenevrə Beynəlxalq Müzakirələrində və hadisələrin qarşısının alınması mexanizmlərində iştirakını yüksək qiymətləndirib. O əlavə edib ki, ATƏT bu istiqamətdə əməkdaşlığı davam etdirməyə və monitorinq missiyası vasitəsilə ekspert dəstəyi göstərməyə hazırdır. “Hökumət etimadı bərpa etməli və demokratik institutları gücləndirməlidir. ATƏT olaraq Gürcüstana Helsinki Yekun Aktında əks olunan prinsiplər əsasında dəstək verməyə hazırıq”, – deyə Valtonen bəyan edib.

www.24news.ge

Gürcüstanda səfərdə olan ATƏT sədri müxalifət liderlərinin saxlanmasını pisləyib

Digər xəbərlər