Geosiyasi gərginlik qızıl və gümüşün qiymətini rekord səviyyəyə çatdırıb

Dünya bazarında qızıl və gümüşün qiymətləri yeni rekord həddə çatıb. 24News.ge xəbər verir ki, Gold Price platformasının məlumatına görə, bir sutka ərzində qızılın qiyməti 1,7 faiz artıb. Tbilisi vaxtı ilə saat 12:30-a olan məlumata əsasən, qızılın bir unsiyasının qiyməti 4 586 ABŞ dolları təşkil edib. Gümüşün qiymətində isə daha kəskin artım qeydə alınıb. Belə ki, bir gün ərzində gümüş 5,35 faiz bahalaşıb və hazırda bir unsiya gümüşün qiyməti 84,11 ABŞ dollarına yüksəlib. Analitiklər qiymətli metallarda müşahidə olunan bahalaşmanı Ukraynadakı müharibə, Yaxın Şərqdəki böhran, eləcə də İranda baş verən iğtişaşlar ilə əlaqələndirirlər. Bundan əlavə, ABŞ-da yaxın dövrdə faiz dərəcələrinin azaldılacağına dair gözləntilər də qiymət artımına təsir göstərən əsas amillərdən biri hesab olunur. Məlumata görə, geosiyasi gərginlik və iqtisadi qeyri-müəyyənlik şəraitində investorlar kapitallarını daha təhlükəsiz hesab edilən qiymətli metallara yönəldirlər. Bununla yanaşı, Reuters tərəfindən sorğulanan analitiklərin proqnozlarına əsasən, 2026-cı ildə qızılın bir unsiyasının qiyməti 4 800–5 000 ABŞ dolları aralığında ola bilər, gümüş isə 90 dolları ötəcək. Bloomberg isə bildirir ki, 2026-cı ildə qızılın qiyməti 5 200 ABŞ dollarına qədər bahalaşa, gümüşün bir unsiyası isə 100 dollara çata bilər. Gürcüstanda mövcud vəziyyətə gəlincə, hazırda bazarda 999 əyarlı qızılın 1 qramının qiyməti təxminən 375 lari civarındadır. 999 əyarlı gümüşün 1 qramı isə təxminən 6 lariyə təklif olunur.

www.24news.ge

Geosiyasi gərginlik qızıl və gümüşün qiymətini rekord səviyyəyə çatdırıb

Digər xəbərlər