Azərbaycanlı müəllimlərə həsr olunmuş kitabın ikinci hissəsi təqdim edilib (VİDEO)

Tbilisidə Mirzə Fətəli Axundzadə adına Azərbaycan Mədəniyyəti Muzeyində Əməkdar Jurnalist Nadir Almazoğlunun müəllifi olduğu “İşıqlı gələcək bəxş edən müəllimlərimiz” kitabının ikinci hissəsinin təqdimat mərasimi keçirilib. 24News.ge xəbər verir ki, tədbirdə ictimaiyyət nümayəndələri, müxtəlif ali təhsil ocaqlarının professorları, məktəb direktorları, müəllimlər, ziyalılar və gənclər iştirak ediblər. Tədbir müəllifin həyat və fəaliyyətinə həsr olunmuş sənədli filmin nümayişi ilə başlayıb. Daha sonra çıxış edənlər Əməkdar Jurnalist Nadir Almazoğlunun fəaliyyətindən danışaraq, onun Gürcüstanda fəaliyyət göstərən Azərbaycandilli məktəblərin müəllimlərinə göstərdiyi diqqətin əhəmiyyətini vurğulayıblar. Çıxışlar zamanı kitabda onlarla müəllim haqqında bioqrafik məlumatların yer alması yüksək qiymətləndirilib. Bunun Gürcüstanda Azərbaycandilli məktəblərin müəllimlərinə həsr olunmuş bu formatda ilk nəşrlərdən biri olduğu qeyd edilib. Tədbirdə çıxış edənlərdən biri müəllifə təşəkkürünü bildirərək, müəllimlərin çoxmillətli və müstəqil Gürcüstan dövlətinin quruculuğunda mühüm xidmətlər göstərdiyini vurğulayıb. “Onları tanıtmaq, onlar haqqında kitab ərsəyə gətirmək alqışlanmalıdır. Azərbaycanlı müəllimlər xalqlarımız arasında əsrlərdir davam edən dostluq münasibətlərinə sadiq, layiqli Gürcüstan vətəndaşları yetişdirirlər. Bu dostluq və qardaşlıq xalqlarımız arasında hər zaman olub və gün keçdikcə inkişaf etməkdə davam edir”, – deyə çıxışda bildirilib. Sonda Nadir Almazoğlu 60 illik yubileyi münasibətilə, Azərbaycan və Gürcüstan arasında mədəni əlaqələrin inkişafına verdiyi töhfələrə görə Mirzə Fətəli Axundzadə adına Azərbaycan Mədəniyyəti Muzeyinin rəhbərliyi tərəfindən xüsusi mükafatla təltif olunub. Mövzu ilə bağlı daha ətraflı əməkdaşlarımızın hazırladığı reportajı təqdim edirik:

www.24news.ge

Azərbaycanlı müəllimlərə həsr olunmuş kitabın ikinci hissəsi təqdim edilib (VİDEO)

Digər xəbərlər