Haqqımızda Reklam
23 
Mar
2024
23:05
62
10
3241

Həsənxocalı kəndində Novruz bayramı münasibətilə tədbir keçirilib (FOTO)

Bolnisi munisipaletinin Xidiskuri (Həsənxocalı) kəndində yerləşən “Parlaq Gələcək Gənclər Mərkəzində” Novruz bayramı münasibətilə tədbir keçirilib. 24News.ge xəbər verir ki, tədbir “Vətəndaş Bərabərliyi Platformasının” və “Parlaq Gələcək Gənclər Mərkəzinin” təşəbbüsü və təşkilatçılığı ilə həyata keçirilib. Tədbirdə Bolnisi munisipaletinin meri David Şerazadişvili, Gürcüstan parlamentinin deputatı Qoqi Meşveliani, Bolnisi sakrebulosunun üzvü Vüqar İsayev, Bolnisi Resurs Mərkəzinin rəhbəri İamze Qvanidze və digər bir sıra qonaqlar iştirak ediblər. Bayram şənliyi Gürcüstanın dövlət himninin səsləndirilməsi ilə başlayıb. Daha sonra tədbiri ön sözüylə “Vətəndaş Bərabərliyi Platformasının” rəhbəri Samirə İsmayılova və “Parlaq Gələcək Gənclər Mərkəzinin” təsisçisi və rəhbəri Araz Musayev açaraq qonaqları Novruz bayramı münasibəti ilə təbrik edib xoş sözlərini çatdırıblar. Tədbirin davamında təhsil mərkəzinin gənc əməkdaşı Elza Məmmədova çıxış edərək şənlikdə iştirak edən çoxsaylı gürcü gənclərinə Novruz bayramı, onun yaranma tarixi, simvolları, adət ənənələri haqqında məlumat verib. Tədbirdə Opera müğənnisi İamze Dzağeli və tar ifaçısı Ramin Pirməmmədov da çıxış ediblər. Mərkəzdə təhsil alan gənclərin və yeniyetmələrin hazırladığı musiqili proqram isə qonaqlar və yerli əhali tərəfindən rəğbətlə qarşılanıb. Gürcü və azərbaycanlı gənclərin birgə iştirakı ilə müşayiət olunan rəqslər şənliyə xüsusi rəng qatıb. Qeyd edək ki, qonşu kəndlərin də əhalisinin iştirak etdiyi tədbir uzun illərdən bəri ilk dəfə olaraq belə yuxarı səviyyədə keçirilib. Novruz tədbiri "Köçəri yallısı"nın sədaları altında başa çatıb.

www.24news.ge

(Şahidi olduğunuz hadisələri çəkib bizə göndərin!) 571798989