Baş nazir İrakli Kobaxidze Prezident İlham Əliyevə məktub ünvanlayıb

Baş nazir İrakli Kobaxidze Azərbaycan Respublikasının Prezidenti İlham Əliyevə təbrik məktubu ünvanlayıb. 24News.ge xəbər verir ki, bu barədə prezident administrasiyasının mətbuat xidməti məlumat yayıb. Sözügedən təbrik məktubunda deyilir: "Zati-aliləri. Gürcüstan hökuməti adından və şəxsən öz adımdan Sizi və xalqınızı Azərbaycan Respublikasının Müstəqillik Günü münasibətilə səmimi-qəlbdən təbrik edirəm. İcazə verin Sizə və Azərbaycan xalqına dərin ehtiramımı ifadə edim, sülh, rifah və uğurlar arzulayım. Gürcüstan və Azərbaycan Respublikası arasında strateji tərəfdaşlıq dərin, uzun əsrlik dostluq ənənəsinə əsaslanır ki, bu da ölkələrimizin səmərəli əməkdaşlığının inkişafı üçün mühüm amildir. Xüsusilə vurğulamaq istərdim ki, Azərbaycanla ikitərəfli və mehriban qonşuluq münasibətlərinin dərinləşməsi bizim hökumətimizin ən əsas prioritetidir. Gürcüstan ilə Azərbaycan arasında qarşılıqlı etimad və dəstək prinsiplərinə əsaslanan strateji tərəfdaşlıq ölkələrimizin əlaqələrinin dinamikasının güclənməsinə müsbət təsir göstərmişdir. Əminəm ki, əməkdaşlığımız daha da möhkəmlənəcək və regionda rifahın, sabitliyin təmin olunmasına öz töhfəsini verəcəkdir. Zati-aliləri, fürsətdən istifadə edərək Sizə bir daha dərin ehtiramımı ifadə edir, qardaş Azərbaycan xalqına firavanlıq, əmin-amanlıq və nailiyyətlər diləyirəm". Qeyd edək ki, sabah Azərbaycanda dövlət bayramı - Müstəqillik Günü qeyd olunacaq. 106 il bundan öncə - 1918-ci ilin mayın 28-də Azərbaycan Milli Şurası dövlət müstəqilliyi aktını qəbul edib.

www.24news.ge

Baş nazir İrakli Kobaxidze Prezident İlham Əliyevə məktub ünvanlayıb

Digər xəbərlər