Şeyx müqəddəs Qurban bayramı ilə bağlı bir sıra sualları cavablandırıb

"Ümumiyyətlə müsəlmanlar 3 gün ərzində qurban kəsə bilərlər. Ancaq Qurban kəsmək üçün ən yaxşı vaxt Qurban bayramı günüdür". Bu barədə 24News.ge xəbər portalına müsahibəsində Gürcüstan Müsəlmanları İdarəsinin (GMİ) şeyxi Hacı Faiq Nəbiyev bildirib. F.Nəbiyev Qruban bayramı ilə bağlı bir sıra suallarmızı cavablandırıb, daha ətraflı müsahibəni sizə təqdim edirik. Hörmətli şeyx istərdik ki, ilk öncə bizə qısa da olsa, Qurban bayramı ilə bağlı məlumat verəsiniz? "İlk öncə bu gözəl günlərdə saytınızın redaksiya heyətinə bu mövzuya önəm verdiyi üçün təşəkkürümü bildirirəm. Həqiqətən bu bayram İslamın böyük bayramlarındandır. Bu bayram haqqında uzun uzadı danışmaq olar. Bu bayram Hz İbrahim Peyğəmbərin həyatında baş verən hadisədən sonra qeyd olunur. Yuxuda Allah Həzrət İbrahimə (ə) oğlu İsmayılı qurban verməyi əmr edir. Həzrət İbrahim (ə) Allahın əmrinə tam olaraq itaət edərək oğlu İsmayılı qurbangaha gətirir. Həzrət İsmayıl özü də qurban olmağa hazır idi. Bu haqda Quranda da qeyd olunur. Lakin Mütəal Allah peyğəmbərinin bu imtahandan keçdiyini gördüyü üçün ona qurbanlıq qoç göndərir. Beləliklə Rəbb razı, Peyğəmbəri razı və ixlasla imtahandan çıxan İbrahim və İsmayıl peyğəmbərin bu əməlləri Qiyamətə qədər bütün müsəlmanlar tərəfindən qeyd olunacaqdır. Bu ibrətlik hadisə Qurbanlıq bayramı kimi tarixə keçib və bayramda kəsilən qurbana “İsmayıl qurbanı” da deyilir". Hacı ümumiyyətlə Qurban kəsmək kimə vacibdir? "Qurban kəsmək hacılara vacib olan əməldir. Lakin imkanı olan şəxslərin bu bayram günündə qurban kəsib ilk növbədə ehtiyaclı şəxslərə verməsi çox təkid olunan əməldir". Hacı çox vaxt sual olunur ki, insanlar birləşib bir yerdə qurban kəsə bilərlərmi? "Bəli qurbanı bir neçə nəfər birləşərək kəsə bilər. Xüsusilə heyvan qıtlığı və ya heyvanın baha olmasına görə bu şəriətlə icazəlidir". Bəs qurbanı nə vaxt kəsmək tövsiyyə olunur və heyvanın yaşı nə qədər olmalıdır? "Ümumiyyətlə müsəlmanlar 3 gün ərzində qurban kəsə bilərlər. Ancaq Qurban kəsmək üçün ən yaxşı vaxt Qurban bayramı günü, Günəş çıxdıqdan sonra və Qurban bayramı namazını qıldıqdan və ya namazdan 1 və ya 2 saat vaxtın keçdiyi zamandır. Heyvanların yaşına gəldikdə isə qoyun 7 ayını keçmiş olsa yaxşıdır, öküz 2 illik, bizim ölkəmizdə olmasa da, ərəb ölkələrində dəvə də kəsirlər onun da yaşı 5 ili keçməlidir. Heyvan sağlam olmalıdır. Gözü kor, ağsayan və bu kimi nöqsanlı heyvan olmamalıdır". Hacı bayram namazı dediniz bu namaz nə vaxt qılınır və qaydası necədir? "Bəli bizim məscidlərimizdə bayram namazı qılınacaq. Odur ki, məsciddə qılınmasının çox savabı vardır. Lakin məscidə gəlməyə imkanı olmayanlar üçün namazın qılınma qaydasını qeyd edim. Qurban bayramı namazı iki rəkətdir. Birinci rəkətdə həmd və surə oxunduqdan sonra beş təkbir deyilməli və hər təkbirdən sonra bir qunut tutulmalıdır. Beşinci qunutdan sonra növbəti təkbir deyilir, ardınca rüku və səcdələr yerinə yetirilir. İkinci rəkətdə dörd təkbir deyilir və hər təkbirdən sonra qunut tutulur. Beşinci təkbirdən sonra rüku və səcdələr yerinə yetirilir. Təşəhhüd və salamla namaz başa çatır. Bu namazların qunutunda istənilən bir duanı oxumaq olar. Məxsus duası da var, bunu internetdən tapıb oxuya bilərlər". Hacı son olaraq ürək sözlərinizi deməyinizi istəyərdik: "Mən əvvəla həmvətənlərimi, sonra dünya müsəlmanlarını bu mübarək Qurban Bayramı münasibətilə ürəkdən təbrik edirəm. Allah Təaladan hamınıza cansağlığı, bol halal ruzi, evi olmyanlara ev, övladı olmayanlara övlad, borcu olanların borclarını verməsi üçün bir çıxış yolu, xəstələrə şifa, əsgərlərə güc-qüvvət, ölkəmiz və dünyaya sabitlik, əminamanlıq və rifah arzu edirəm. Bayramınız mübarək olsun". Qeyd edək ki, iyun ayının 16-sı və 17-də ölkənin əksər məscidlərində qurbanlar kəsiləcək, bayram namazları qılınacaq.

www.24news.ge

Şeyx müqəddəs Qurban bayramı ilə bağlı bir sıra sualları cavablandırıb

Digər xəbərlər