Avropa rəsmiləri Gürcüstanla bağlı kəskin bəyanat yayıb, sanksiyalar tələb ediblər

Avropa ölkələri parlamentlərinin xarici əlaqələr komitələrinin sədrləri və deputatlar Gürcüstanla bağlı birgə bəyanat yayıblar. 24News.ge xəbər verir ki, bəyanata imza atan Avropalı rəsmilər “Gürcüstanın son demokratik tənəzzülünə” görə kədərləndiklərini bildirirlər. Sənəddə oktyabrın 26-da keçirilmiş seçkilərdən və Gürcüstanda parlament seçkilərinin “görünməmiş sayda insident və sistem pozuntuları ilə” keçirildiyindən narahatlıq ifadə olunub. Bəyanatda müstəqil beynəlxalq araşdırmanın aparılmasının zəruriliyi vurğulanıb və Gürcüstan rəsmilərinə qarşı sanksiyalar tələb olunub. Qeyd olunur ki, Gürcüstanın son zamanlar demokratik geri çəkilməsi, o cümlədən müstəqil vətəndaş cəmiyyəti və insan hüquqlarını məhdudlaşdıran anti-Avropa qanunvericiliyinin qəbulu böyük təəssüf hissi doğurur. Sənəddə bildirilib ki, seçkilərin ədalətli keçirilməsi və qanunun aliliyinin qorunması Avropa dəyərlərinin tərkib hissəsi və əsasıdır. Gürcüstan Avropa İttifaqına namizəd ölkə kimi ona sadiqlik nümayiş etdirməlidir. Bəyanatda deyilir: "Biz Gürcüstan rəsmilərindən tələb edirik ki, seçki manipulyasiyası ilə bağlı bütün iddialar (o cümlədən seçkiqabağı dövr) şəffaf şəkildə araşdırılsın, xüsusilə seçicilərin hədələnməsi və səslərin satın alınması kimi faktlar üzə çıxarılsın. Çünki əlimizdə olan iddialar o qədər ciddidir ki, bu seçkilər və seçkiqabağı dövrdə və seçkilər zamanı müşahidə olunan bütün pozuntuları yalnız müstəqil beynəlxalq araşdırma öyrənib araşdıra bilər. Biz Avropa İttifaqını və transatlantik müttəfiqləri seçki prosesinin pozulmasına, o cümlədən dövlət institutlarından və inzibati resurslardan istifadəyə görə məsuliyyət daşıyan Gürcüstan rəsmiləri və siyasi liderlərini, o cümlədən Bidzina İvanişvilini sanksiyalara cəlb etməyə çağırırıq. Biz vətəndaş cəmiyyəti və qanunun aliliyi strukturlarının yaradılmasında iştirak edənlər istisna olmaqla, Gürcüstanın dövlət və ictimai qurumlarının yardım və əməkdaşlıq layihələrində istifadə olunan bütün Aİ maliyyələrinin dondurulmasını tələb edirik. Xüsusilə gənclər üçün viza azadlığının nə qədər vacib olduğunu bilirik. Biz Avropa Komissiyasını və Avropa Şurasını yuxarıda qeyd olunan [şərtlər] yerinə yetirilmədikdə, onun tam dayandırılması ehtimalını istisna etmədən, Gürcüstanla viza liberallaşdırılması rejiminə yenidən baxmağa çağırırıq. Biz gürcü xalqının və onun Avropa seçiminin yanında olmağa davam edəcəyik. Biz həmçinin beynəlxalq səviyyədə tanınmış sərhədlər daxilində Gürcüstanın müstəqilliyini, suverenliyini və ərazi bütövlüyünü sarsılmaz şəkildə dəstəkləməyə davam edəcəyik”. Qeyd edək ki, sözügedən sənədə 30-dək Avropa ölkələri parlamentlərinin xarici əlaqələr komitələrinin sədrləri və deputatları imza atıblar.

www.24news.ge

Avropa rəsmiləri Gürcüstanla bağlı kəskin bəyanat yayıb, sanksiyalar tələb ediblər

Digər xəbərlər