DTX-dan açıqlama: Gürcüstanda hakimiyyətin zorla dəyişdirilməsi planlaşdırılıb

Gürcüstan ərazisində və onun hüdudlarından kənarda fəaliyyət göstərən müəyyən qrup şəxslər ölkədə vətəndaş qarşıdurmaları yaratmağı və sabitliyi pozmağı planlaşdırıblar. 24News.ge xəbər verir ki, bu barədə Gürcüstanın Dövlət Təhlükəsizliyi Xidmətinin 2024-cü il üzrə hesabatında qeyd olunub. Sənəddə bildirilir ki, əsas məqsəd hakimiyyəti zorakı yolla dəyişdirmək olub. Hesabatda deyilir: “Müxtəlif vaxtlarda ölkədən kənarda yaşayan Gürcüstan vətəndaşları cinayət planlarında fəal iştirak ediblər, xüsusən də Ukraynada döyüşən gürcülərin müəyyən hissəsi Gürcüstana gəlməyə və polisə qarşı planlaşdırılan zorakılıqda fəal iştirak etməyə hazır olduqlarını bəyan ediblər ki, bu da vəziyyətin həddindən artıq gərginləşməsinə gətirib çıxara bilərdi. Hakimiyyətdə təmsil olunan vəzifəli şəxslərin aradan götürülməsi də müzakirə olunub. Etirazların təşkilatçılarının məqsədi Tbilisidə baş verən prosesləri “maydan”a çevirmək, şəhərin nəqliyyat qovşaqlarını iflic etmək, dövlət qurumlarına və strateji obyektlərə, hüquq-mühafizə orqanlarının yerləşdirildiyi bazalara giriş yollarını bağlamaq, mərkəzi prospektlərdə çadır şəhərciklərinin qurulması planlaşdırılıb". Hesabatda vurğulanıb ki, etirazların təşkilatçıları 2024-cü il dekabrın 14-də keçirilmiş prezident seçkiləri prosesini də pozmağı planlaşdırıblar və bu məqsədlə parlament binası ətrafında vəziyyəti maksimum gərginləşdirmək, insan tələfatı yaratmaq və buna görə məsuliyyətin hökumətin üzərinə qoyulması nəzərdə tutulub. Qeyd olunur ki, əks-kəşfiyyat fəaliyyəti nəticəsində xarici dövlətlərin xüsusi xidmət orqanlarından ruhlanan ölkənin milli maraqlarına ziyan vuran tədbirləri zərərsizləşdirmək mümkün olub.

www.24news.ge

DTX-dan açıqlama: Gürcüstanda hakimiyyətin zorla dəyişdirilməsi planlaşdırılıb

Digər xəbərlər