Tbilisidə partlayıcı maddələrin təyinat yeri kimi yaşayış evi müəyyən edilib

Dövlət Təhlükəsizliyi Xidmətinin rəis müavini Laşa Mağradze bu gün keçirilən brifinqdə Gürcüstana Ukraynadan qanunsuz gətirilmiş partlayıcı maddələrlə bağlı aparılan istintaqın yeni detalları barədə məlumat verib. 24News.ge-nin məlumatına görə, Mağradze bildirib ki, hazırda aparılan araşdırmalar zamanı 4 oktyabrda keçiriləcək parlament seçkiləri və radikal qrupların planları ilə Ukrayna vətəndaşlarının partlayıcı maddələrin qanunsuz alınması faktı arasında əlaqənin olub-olmaması üzərində aktiv iş aparılır. Onun sözlərinə görə, aşkarlanmış partlayıcı maddənin son təyinat yeri kimi Tbilisinin Avlabar ərazisində yerləşən bir yaşayış evi müəyyən edilib. İki Ukrayna vətəndaşının saxlanıldığını qeyd edən rəis müavini onların üzərindən 2,4 kiloqram “Heksogen” partlayıcı maddəsinin götürüldüyünü bildirib. Partlayıcı maddə Gürcüstana Rumıniya, Bolqarıstan və Türkiyə vasitəsilə gətirilib. Əməliyyat zamanı məlum olub ki, “Mercedes” markalı yük maşınının sürücüsünə Ukrayna xüsusi xidmət orqanlarının əməkdaşları partlayıcı maddəni təhvil veriblər. Saxlanılan şəxslər ifadəsində partlayıcı maddənin son təyinat yerinin Rusiya olduğunu bildiriblər. Lakin hazırkı istintaq materiallarında əsas son təyinat yeri Tbilisi göstərilir. Dövlət Təhlükəsizliyi Xidməti mövcud iş üzrə cəmiyyətə məlumat verməyə davam edəcəyini vurğulayıb.

www.24news.ge

Tbilisidə partlayıcı maddələrin təyinat yeri kimi yaşayış evi müəyyən edilib

Digər xəbərlər